ཞང་ཞུང་ཚང་།

3 མཆན།:

chungtse said...

ན་ལེན་ཏྲ་རུ་རོང་སྟོན་ཆེན་པོའི་དྲུང༌། །མཚན་ཉིད་རྒྱུ་ཡི་སྒྲོ་འདོགས་གཅོད་པའི་དུས། །བཀའ་སྡེ་བཅུ་པོར་འགྲན་པའི་ཟླ་བྲལ་བའི། །རབ་འབྱམས་ཆེན་པོར་གྲགས་པའི་མཉམ་མེད་པ། །ཞེས་པ་དེ། དབུས་ཀྱི་ས་སྐྱའི་གདན་ས་ན་ལནྜ་རེད་དམ། དེ་ཡིན་ན། དམ་པ་ཁོང་གིས་ངའི་སྐྱེ་ཡུལ་ལའང་ཞབས་ཀྱིས་བཅག་འདུག སྐབས་དེར་གསང་ཕུ་ནི་ཧ་ཅང་གྲགས་ཆེ་བའི་བཤད་གྲྭ་ཞིག་རེད། གསང་ཕུ་དབྱར་ཆོས་དང་འཇང་དགུན་ཆོས་ཞེས་ཧ་ཅང་གྲགས་ཆེ་བའི་ཆོས་གྲྭ་གཉིས་ལས་སྔ་མ་དབྱར་དུས་སུ་འཁེལ་བས། ཧ་ཅང་སྐྱིད་པར་གྲགས།
མཉམ་མེད་ཤེས་རབ་རྒྱལ་མཚན་གྱི་རྣམ་ཐར་རྙིང་ཤོས་གང་ཡིན་ནམ། མཛད་པ་པོ་སུ་རེད། ནམ་མཛད་པ་རེད། དམ་པ་ཁོང་གི་རང་རྣམ་ཡོད་དམ།

མཉམ་མེད་ཤེས་རབ་རྒྱལ་མཚན་དང་དེང་གི་སྨན་རིའི་ཁྲི་འཛིན་སོགས་ཀྱི་མཛད་རྣམ་ལ་གཞིགས་ན། གཡུང་དྲུང་བོན་གྱི་རྗེས་འཇུག་ཚོའི་ཁྲོད་དུ་རང་བསྟན་བོན་ལ་ཐོས་བསམ་གནང་བ་ཙམ་དུ་མ་ཟད། བན་དེའི་གདན་ས་རྣམས་སུའང་ཕེབས་ཏེ་སློབ་གཉེར་གནང་བའི་སྲོལ་ཞིག་མཇལ་རྒྱུ་འདུག དེ་རྣམ་ཐར་རང་གི་གསུང་སྟངས་ལྟར་ན། རིས་མེད་ཀྱི་ཉམས་བཞེས་གནང་སྟངས་རེད། ཡང་ན་གཞན་སྡེ་འགོག་པ་ལ་དེའི་ཚུལ་མཁྱེན་དགོས་པར་དགོངས་པ་རེད། དེ་མིན་རང་བསྟན་བོན་གྱིས་ཐུགས་མ་ཚིམ་པར་ཕེབས་པ་རེད། དེ་ཚོ་གཅིག་གསུངས་ཐུབ་ན་ཕྲན་ལ་ཕན་ས་རེད།

June 12, 2010 at 8:50 PM

ཞང་ཞུང་པ། said...

སྐུ་ངོ་ལགས། ཁྱེད་ཀྱི་བཀའ་དྲི་དེ་དེ་རིང་བར་མ་མཇལ་བས་དགོངས་ཡངས་གནང་བ་ཞུ།
དྲི་བ་དང་པོ་ལ། ས་སྐྱའི་ཉེ་འགྲམ་ལ་ཡོད་པའི་འབྲ་བུ་སྐྱེད་ཚལ་ཞེས་པར་ངོས་འཛིན་གནང་སྲོལ་འདུག
དྲི་བ་གཉིས་པ་ལ།
རྗེ་མཉམ་མེད་ཆེན་པོའི་རྣམ་ཐར་འགའ་ཞིག་ཡོད་པ་རེད་ལ། དེའང་༸རྗེ་རིན་པོ་ཆེའི་རྣམ་ཐར་འདོར་བསྡུས་སྐལ་ལྡན་དྭངས་བ་འདྲེན་བྱེད་ངོ་མཚར་པདྨོ་སྟོང་ལྡན་ཞེས་བྱ་བ་འདི་ནི། ཀུན་མཁྱེན་ཉི་མ་བསྟན་འཛིན་གྱིས་རྣམ་ཐར་མི་འདྲ་བ་གསུམ་ལ་ལྟོས་ནས་བསྒྲིགས་ཞེས་གསལ།
༸རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་གྱིི་རྣམ་ཐར་ངོ་མཚར་པད་མོའི་འཕྲེང་བ་ཞེས་བྱ་བ་དེ་ནི། རྗེ་ཉིད་ཀྱི་རྒྱལ་ཚབ་རིན་རྒྱལ་གྱི་དངོས་སློབ་བཙུན་པ་གྲགས་པ་རྒྱལ་མཚན་གྱིས་ཡིག་གེར་བཀོད་ཞེས་གསལ། རྙྀང་ཤོས་ཀྱང་ཕལ་ཆེར་འདི་ཡིན་པར་ངེས། ཁ་རྒྱུན་ལ་རྗེ་རིན་པོ་ཆེའི་རང་རྣམ་རྒྱས་པ་ཞིག་ཡོད་ཀྱང་། དེ་བོད་གཞུང་གིས་གཡར་རོགས་ཞུས་ནས་དེའི་ནང་དུ་རྗེ་བློ་བཟང་གྲགས་པ་དང་རྗེ་མཉམ་མེད་རྣམ་གཉིས་ཀྱི་རྩལ་འགྲན་དང་རྗེ་གཙང་ཁ་པས་རྗེ་མཉམ་མེད་ཆེན་པོ་ལ་བསྟོད་པ་ཕུལ་བ་སོགས་ལ་ཡིད་མ་རངས་ནས་ཡར་སྤྲད་རོགས་མ་བྱས་པས་མ་དཔེ་བོར། ཞེས་བཤད་མཁན་ཡང་ཡོད།
དྲི་བ་གསུམ་པ་ལ། རྗེ་མཉམ་མེད་ཆེན་པོ་དང་སྨན་རིའི་ཁྲི་འཛིན་སོ་གསུམ་པ་མཆོག ད་དུང་བོན་གྱི་བླ་ཆེན་འགའ་ཞིག་གཞན་སྡེའི་གྲྭ་སར་ཕེབས་གནང་བ་རྣམས་ནི། གངས་ཅན་བོད་ཀྱི་ཕ་ནོར་གཡུང་དྲུང་བོན་གྱི་གཞུང་ལུགས་རྒྱ་མཚོ་འདྲ་བ་དེས་མ་ངོམས་ནས་གཞན་ཆོས་སྦྱོང་བར་ཕེབས་པ་དང། ད་དུང་གཞན་སྡེའི་གཞུང་ལུགས་ལ་དགག་ལན་བརྒྱག་རྒྱུའི་ཆེད་དུ་དེ་བས་ཡིན་ས་མ་རེད། དེ་ནི་རྗེ་ཉིད་ཀྱི་ཞལ་ནས། བདག་གིས་ནི་ལུང་རིག་སྨྲ་བའི་སྐྱེས་བུ་ཙམ་ལ་ཡིད་རངས་བགྱིད་དོ།་རང་ལྟ་ལ་མི་ཆགས། གཞན་ལྟ་ལ་མི་སྡང་བའི་སྒོ་ནས། གྲུབ་མཐའི་རྣམ་བཞག་འབྱེད་པ་ནི་ཤེས་རབ་སྐྱེ་བའི་རྒྱུ་དང། དག་སྣང་སྦྱོང་བའི་ཐབས་ཁྱད་པར་ཅན་ཡིན་པས་དམ་པའི་ལུགས་སུ་འདོད་དོ། གསུངས་པ་ལྟར་ཡིན།
དེ་དང་འདྲ་བར་གཡུང་དྲུང་གླིང་གི་དཔོན་སློབ་མཁས་གྲུབ་ལུང་རྟོགས་རྒྱ་མཚོའི་སློབ་མ་སེར་འབྲས་དགེ་གསུམ་ནས་ཚུར་ཕེབས་ཏེ་མཁས་པའི་གོ་སར་འགྲིམས་པ་དེ་འདྲའད་འདུག་པས། དེ་འདྲའི་རིགས་བོན་བེན་གཉིས་ཀར་འདུག་དམ་པའི་ལུགས་ཡིན་པར་མངོན་ནོ།

June 15, 2010 at 11:48 PM

chungtse said...

བཀའ་ལན་གནང་བར་ཐུགས་རྗེ་ཆེ་ཞུ། ༼བདག་གིས་ནི་ལུང་རིག་སྨྲ་བའི་སྐྱེས་བུ་ཙམ་ལ་ཡིད་རངས་བགྱིད་དོ།་རང་ལྟ་ལ་མི་ཆགས། གཞན་ལྟ་ལ་མི་སྡང་བའི་སྒོ་ནས། གྲུབ་མཐའི་རྣམ་བཞག་འབྱེད་པ་ནི་ཤེས་རབ་སྐྱེ་བའི་རྒྱུ་དང། དག་སྣང་སྦྱོང་བའི་ཐབས་ཁྱད་པར་ཅན་ཡིན་པས་དམ་པའི་ལུགས་སུ་འདོད་དོ།།༽ཞེས་པའི་གསུང་འདིས་ལུས་ཀྱི་བ་སྤུའང་གཡོ་བའི་ཚོར་བ་ཁྱད་པར་བ་ཅན་སྐྱེས། སྐྱེ་ཞིང་སྐྱེ་བར་དེ་འདྲའི་རྣམ་དཔྱོད་ལྡན་ཞིང་ཆགས་སྡང་ཕྱོགས་རིས་སྤངས་པའི་ལམ་བཟང་པོར་འཇུག་ཐུབ་པར་སྙིང་ནས་སྨོན།།

June 16, 2010 at 8:09 AM