Monday, May 24, 2010
རྣམ་དབྱེ་བརྒྱད་ཀྱི་དཔེར་བརྗོད་བཅོས་སྒྲུང་དང་སྦྱར་བ
7:00:00 PM | 
ཟིན་བྲིས་གཉེར་མཁན།
ཞང་ཞུང་པ། |
༡༽ ལ་དོན།
གནའ་སྔ་མོར་ཡུལ་མཛེས་ལྗོངས་ལྟ་ན་སྡུག་པ་ཞིག་ན། ཕ་མ་སྔ་ས་ནས་མེད་པའི་མིང་སྲིང་གཉིས་འཚོ་བཞིན་གནས། དེའང་བུ་བཀྲ་ཤིས་ནི་ཆུང་ཡང་བློ་རིག་བཀྲ་བ། དཔའ་རྩལ་ཆེ་བ་ཞིག་ཡོད་པས་ཉིན་ལྟར་རི་ཀླུང་གང་སར་བསྐྱོད་དེ། འཚོ་བའི་མཁོ་ཆས་སོགས་བཙལ་གྱིན་ཡོད། བུ་མོ་སྒྲོན་མ་ནི་ཡག་མོ་སྒོ་ཐ་དག་ཚང་ཞིང༌། རྒན་ལ་བརྩི་བཀུར་ཆེ་བ་སོགས་འཛངས་མའི་ཡོན་ཏན་ཐ་དག་ལྡན་པ་ཞིག་ཡོད་ལ། མོ་ནི་ཁྱིམ་དུ་སྣ་འཛོམས་ཀྱི་མེ་ཏོག་སོགས་མཛེས་ལྗོངས་ཀྱི་ལྡུམ་རར་ཆུ་གཏོང་བ་དང་ཟས་ཀྱི་གཡོ་སྦྱོར་སོགས་བྱེད་ཀྱིན་ཡོད། དེའང་མེ་ཏོག་རྣམས་ནི་འོད་དུ་འཚེར་ཞིང་སྦྲང་བུ་རྣམས་འབབ་སྐབས་སུ་བཟི་ཤུགས་ཀྱིས་འདབ་ལོ་དག་ལྡེམ་ལྡེམ་དུ་གཡོ་བཞིན་ཡོད།
༢༽ འབྲེལ་སྒྲ།
བུ་མོ་སྒྲོན་མའི་སྒེག་ཉམས་དང་གཤིས་རྒྱུད་འཇམ་པའི་ཡག་མོ་སྒོ༌། བུ་བཀྲ་ཤིས་ཀྱི་སྨིག་གཟེངས་མཐོ་ལ་དཔྲལ་ཞིང་ཆེ་བའི་ཕོ་ཉམས་སོགས་ནི་ཟླ་བའི་ལྷ་མོ་དང་རྒྱལ་སྲས་གཞོན་ནུ་སོགས་ཀྱང་རེ་ཞིག་ངོ་གནོང་དགོས་པ་ལྟ་བུ་ཞིག་ཡོད།
༣༽ བྱེད་སྒྲ།
ཉིན་ཞིག་བུ་བཀྲ་ཤིས་ཀྱིས་མདུན་རིའི་ཀླུང་ནས་ཤ་བ་མ་བུ་གཉིས་ཆུར་ཡོང་བ་མཐོང་སྟེ། མདའ་གཞུ་རྣ་འགྲམ་དུ་བཀང་ནས་གསོད་རྩིས་བྱེད་སྐབས་ཁོའི་མིག་ལམ་དུ་ཤ་བ་མ་བུའི་བརྩེ་གདུང་གི་རྣམ་འགྱུར་དག་ཤར་ཡོང་བས་ཁོའི་མཐེབ་ཤ་ཇེ་ལྷོད་ནས་ཇེ་ལྷོད་དུ་སོང༌། ད་ནི་ཉི་མའང་ལ་ཁར་གཞུད་རེན་སོང་ལ། བྱ་དང་བྱིའུ་དག་རང་རང་གི་ཚང་མལ་དུ་ལོག་པའི་དྲུག་འགྱུར་རྣམས་སྙན་ཡང་སྙན། བཀྲ་ཤིས་ལ་མཚོན་ན་རི་དྭགས་ཞིག་དགོས་ཀྱང་མ་བརྙེད་པས། ཁོ་ཡང་བྱ་དང་བྱིའུ་དེ་དག་དང་འདྲ་བར་གླུ་ཆུང་ཞིག་ལེན་བཞིན་ག་ལེར་འཕྲད་ལམ་དེ་ནས་ནང་དུ་ཕྱོགས།
༥༽ ལྷག་བཅས།
སྒྲོན་མས་དགོང་ཟས་བཀོལ་ཏེ་ཁྱི་རྒན་རྒྱ་རིལ་ལ་ལྟོ་ཡིད་ཚིམས་པ་ཞིག་གཏད་རྗེས་གཅུང་པོ་ལོག་སླེབས་རྒྱུར་བསྒུགས། ཅུང་ཙམ་ནས་ཁྱི་རྒན་རྒྱ་ལུ་ཟུག་ཙམ་བྱས་བྱུང་བས་མོ་ཕྱི་རུ་ཐོན། མོས་མདུན་རིའི་རྐང་ལམ་ནས་ཚུར་ཡོང་བཞིན་པའི་གཅུང་པོ་བཀྲ་ཤིས་ཀྱི་རྒྱབ་ཏུ་ཅི་ཡང་མེད་པར་མཐོང་ཐུབ་སྟེ། ཁོའི་རྡོག་སྒྲ་རྣམས་གསལ་ལྷང་ལྷང་མོའི་རྣ་ལམ་དུ་གྲགས་ཡོང༌།
༦༽ འབྱེད་སྡུད།
བཀྲ་ཤིས་ནང་དུ་སླེབས་རྗེས་ཁོས་གཅེན་མོར་དེ་རིང་གི་གནས་ཚུལ་ཡོད་ཚད་སྨྲས་པས་མོ་ལ་ཁོས་བཤད་པ་རྣམས་བདེན་ནམ་རྫུན་སྙམས་པའི་དོག་པའང་ཏིལ་འབྲུ་ཙམ་ཡང་མ་སྐྱེས་ལ། ཆུང་དུས་ཨ་མས་འཚོ་སྐྱོང་བྱས་པའི་དྲན་ཤེས་རྣམས་ཇེ་གསལ་ནས་ཇེ་གསལ་དུ་སོང་བས། མོས་དབུགས་རིང་ཞིག་དང་མཉམ་དུ་གཅུང་པོའི་གྲུང་ཤ་དོད་པའི་མིག་འོད་ལ་ཕྱོགས་ཏེ་མུ་མཐུད་ཁོའི་སྐད་ཆར་ཉན།
༧༽ འབྱུང་ཁུངས།
ཁོང་གཉིས་ནི་ཡུལ་ལྗོངས་དེར་གནས་པའི་དབུགས་ཐོག་ཀུན་ལས་ཕན་ཚུན་བརྩེ་བ་ཟབ་ཤོས་གཉིས་ཡིན་ལ། ལྷག་པར་སྒྲོན་མ་ལ་གཅུང་པོ་ལས་ལྷག་པའི་ཁྱད་ཆོས་ཞིག་ཡོད་པ་ནི། ནམ་ཞིག་བཀྲ་ཤིས་ལ་གོད་ཆགས་འདྲ་འབྱུང་སྲིད་ཚེ། མོ་ཡང་དུས་དེ་ནས་བཟུང་འཇིག་རྟེན་འདིར་ཕྱི་མིག་མི་བལྟ་རྒྱུའི་དམ་བཅའ་གཏན་པོ་ཞིག་ཡོད་པ་དེ་ཡིན་ལ། དེ་དུས་མོའི་མིག་ཟུང་ལས་འཆི་མའང་འདོན་མི་སྲིད་ཟེར།
༨༽ འབོད་སྒྲ།
མོས་ཉིན་ཞིག་འདི་ལྟར་སྨྲས། ཀྱཻ་བློ་གྲོས་དཔའ་རྩལ་ལྡན་པའི་གཅུ་པོ་ལགས། ། ཁྱེད་བློའི་འདབ་མའི་གྲིབ་བསིལ་གཡོ་བ་ལས། །གཅེན་མོའི་དགའ་བའི་འཛུམ་ཟེར་ནམ་ཡང་འཚོ། །འདི་ལྟར་མི་འབྲལ་རྟག་ཏུ་གནང་ཞིག་ཀྱཻ། ། ཞེས་སྨྲས་པས། གཅུང་པོས། ཀྭ་ཡེ་རིགས་བཟང་ལྷ་མོའི་རྟགས་འཆང་བའི། །མཛངས་མའི་བློ་གྲོས་མངའ་བའི་གཅེན་མོ་ཁྱེད། །གང་ཞིག་ལས་ཀྱིས་འབྲལ་བ་མ་གཏོགས་པར། །བདག་ལུས་གྲིབ་མ་བཞིན་དུ་ཁྱེད་ལ་འཁོར། ། ཞེས་སྨྲས་པས། གཅེན་མོ་སྒྲོན་མའི་གནག་སྣུམ་གྱི་སྐྲ་ལོ་དང་ལྷན་དུ་མགོ་བོ་གཅུང་པོའི་པང་དུ་བསྙེལ་བཞིན་གཉིད་དུ་ཡོལ།། །།
སྡེ་ཚན།
རྒྱུན་ཤེསར་བ།
Subscribe to:
Post Comments (Atom)
ཟིན་བྲིས་གཙོ་གཉེར་བ་ཞང་ཞུང་པ།
ཞང་ཞུང་པ་ཞེས་པའི་དྲྭ་རྒྱ་གཙོ་གཉེར་བ་ནི། མཐོ་སྒང་སྦྲ་ནག་གི་ཐུ་འོག་ནས་ཚར་ལོང་བྱུང་ཞིང་ཤེས་རིག་གི་བདུད་བརྩི་ལྷོ་ མཐའི་ཡུལ་ནས་མྱོང་བའི་ཡུལ་གྱར་བ་ཞིག་ཡིན།
0 མཆན།:
Post a Comment
མཆན།